Таравари бара МВР и ЈО да преземат мерки за инцидентот во гимназијата, а Дескоска да го разреши директорот

Градоначалникот на Гостивар, Арбен Таравари побара Министерството за внатрешни работи и Јавното обвинителство да го решат случајот регистриран во гостиварската гимназија во петокот во кој беа повредени двајца професори и да преземат соодветни мерки.

„МВР и ЈО да преземат конкретни чекори. Јас сум сигурен дека доколку напаѓачите беа активисти на Алијанса за Албанците до сега ќе беа во затвор, додека двајцата активисти на ДУИ кои го извршија нападот во петокот, денес слободно се шетаат низ градот и се закана за повеќето граѓани во Гостивар. Се надевам дека министерката за образование ќе го разреши директорот на гимназијата бидејќи главниот организаотр на целиот овој настан е тој. Директорот најверојатно ги повикал двајцата вооружени кои влегоа во гимназија и ги нападнаа професорите“, рече градоначалникот.

Таравари изјави дека двајцата професори завршиле на клиниките во Скопје, а едниот од нив бил задржан на натамошно лекување.

„Сакам да верувам дека државата е иста и законот е ист за сите граѓани, се надевам дека тие што го направија тоа во петокот, ќе одговараат пред суд и ќе бидат затворени што побрзо за власта да покаже дека не е толерантна кон криминалците икон оние што ја злоупотребуваат службената положба. Оливер Спасовски често е гледан во Гостивар како се шета токму со такви луѓе кои носат пиштоли и секакви оружја со себе. Доколку државата продолжува да ги штити тие што се однесуваат како бандити, нема да имаме напредок“, изјави Таравари додавајќи дека проблемите во училиштата во Гостивар се последица на одлуката на Министерството за образование да ги одземе  надлежностите на општината.