Таравари: Буџетот е инвестициски – опозициските советници: Буџетот е популистички и манипулаторски

Иако беше едногласно усвоен на денешната седница на Советот на Општина Гостивар, буџетот за 2020-та година покрена силни спротивставувања меѓу општинската власт и опозицијата.  Градоначалникот Арбен Таравари нагласи дека буџетот е инвестициски, а непродуктивните трошоци се намалени.

„Капиталните инвестиции опфаќаат износ од над 3 милиони евра, и тука две третини ќе се финансираат од основниот буџет, мал дел донации и само 5% кредити. Предвидени изградба и реконструкции на локални патишта и улици како во градот, така и низ селата, важни проекти, канализации, водоводи и друго. Ова е еден инвестициски буџет. Тековните трошоци, таканаречени непродуктивни ги намалуваме за околу 300 илјади евра. Програмата на градоначалникот е минимална и многу помала во однос на градоначалниците во другите општини.“, рече Таравари.

Газменд Мемеди од советничката група на ДУИ го нарече буџетот популистички и манипулативен. „Ќе гласаме за буџетот, но ќе бараме извинување од граѓаните затоа што ова е популистички и манипулаторски буџет. Ќе го поддржиме само затоа што не сакаме повторно градоначалникот да губи време да не обвинува за опструкции, туку да го користи времето за да работи. Ова е популистички, манипулативен буџет, без стратегија“, потенцираше Мемеди.

Ставот на советничката група на СДСМ и НСДП на говорницата го искажа Зоран Анѓелов, од социјал-демократскиот сојуз.

„Го разгледавме буџетот и забележавме дека не се влезени доста проекти коишто ние ги предложивме во Развојната програма и има многу работи што треба да се сменат. Меѓутоа, поради конструктивност, како што беше и за минатиот буџет и за некои ребаланси, ние ќе го поддржиме буџетот.“, изјави Анѓелов.

И советникот од ДСР, Кашмир Салиу рече дека многу проекти кои биле во Развојната програма не се внесени во буџетот, но дека како претставник на ромската заедница, го поддржува затоа што содржи голем број на инфраструктурни проекти кои ги засегаат Ромите. „Ако претходно имаше образложение дека постојат пречки, некој го кочи буџетот, сега за прв пат имаме позитивна ситуација, што е одлична можност за целосна реализација. Јас цврсто ќе се залагам, Ресурсниот центар за Ромите, до крајот на мојот советнички мандат да се изгради и потенцирам дека будно ќе ја следам реализацијата на проектите што се зацртани“, нагласи Салиу.

Како што веќе пишувавме, буџетот на Гостивар за 2020-та година изнесува 18,5 милиони евра.