Таравари: Ги завршуваме нашите обврски, плативме 20 илјади евра за струја во училиштата

На обвинувањата за несоработка и негрижа за училиштата, кои директорот на техничкото училиште ги испрати на негова адреса, гостиварскиот градоначалник одговори дека ги завршуваат сите обврски кон школите, кои се во нивна надлежност.

„Обврските на градоначалникот кон училиштата се две: назначување на директори и влијание врз план програмите за настава. Другите ингеренции не се мои. Ако очекуваат директорите јас да им однесам нафта, бензин, да им организирам се друго во училиштата, тогаш грешат. Тие се присилни директори кои се поставени од министерот за образование и треба таму да се обратат. Нашето го правиме. Блок-дотациите како што стигнуваат, така се префрлуваат на училиштата. Ние од тие пари не чепкаме ништо, ниту пак имаме законска можност. Сега плативме 20 илјади евра, долгови за струја за сите училишта и тоа од општински пари со кои можевме да направиме асфалтирање, канализација“, рече Таравари и нагласи дека некои од училиштата на своја рака објавиле тендери за превоз, што е обврска на општината која пак целосно ја завршила таа процедура. Според него транспортот на учениците од првиот училишен ден ќе се одвива без пречки.