Таравари: Ќе бидам на протестот за Русино утре во 17 часот

Трет ден забраната за носење ѓубре на Русино, важи и за отпадот од Гостивар. Ваквиот потег на граѓанската иницијатива што ја блокира депонијата, за градоначалникот Арбен Таравари бил неочекуван и непотребен. Првиот човек на Гостивар вели дека со активистите имале добра соработка, а општината им ги исполнила барањата. Сега одново ќе се обидат да најдат заеднички јазик.

„Оваа одлука на граѓанската иницијатива малку не зачуди, затоа што имаме добра соработка и со „Гвеко“ и со „Стоп Русино“ и сите барања до сега сме ги реализирале. Ако продолжи блокадата и за камионите од Гостивар, нема да можеме да го собираме ѓубрето и градот ќе ни смрди, ќе се затрупа со смет. Но, за тоа не сме ние виновни, во иницијативата има луѓе со проблематично однесување, кои мислат дека на таков начин може да се реши проблемот. До кога ќе тераат така, јас навистина не знам. Денес ќе ги посетам, ме повикаа и се надевам дека ќе ја надминеме оваа ситуација“, изјави Таравари.

Граѓанските активисти го забранија Русино и за Гостивар, по изјавата на министерот за екологија Нуредини дека тоа ќе биде регионална депонија во наредните 10 години. Но, и од незадоволство кон општината поради закажаниот избор на членови на управниот одбор на регионалното претпријатие за Русино.

„Ние имаме обврски кон донаторот на проектот, како и рокови од Министерството за животна средина. Им реков на граѓаните, нека направат писмено барање да се стопира процедурата, ќе го доставиме до Советот, јас ќе лобирам кај советниците од мојата партија, тие нека лобираат кај останатите и советот нека го прифати нивното барање.“, рече градоначалникот

На јавната покана на иницијативата Стоп Русино за присуство на протестот, којшто ќе се одржи утре во Гостивар, градоначалникот одговори позитивно. „Да, утре во 17 часот ќе бидам на протестот. Ќе се задржам пократко, можеби околу 15 минути, заради состанок на кој мора да одам во Тетово, но во 17 часот ќе бидам тука“, рече Таравари.

Проблемот со Русино за сега само се врти во круг. Граѓаните бараат итна постапка за изнаоѓање на нова локација за депонирање на сметот од Полог, додека институциите инсистираат на спроведување на проектот за стандардизација на Русино во регионална депонија.