Таравари: Континуирано ги третираме кучињата скитници, проблемот е што се носат од други градови

Кучињата скитници и натаму остануваат сериозен проблем и закана по безбедноста на граѓаните во Гостивар. Глутници кучиња се собираат на различни локации, сеат страв, дел од нив се агресивни, а изминатиов период се бележат и зачестени напади кои се случуваат и дење и ноќе.

Гостиварци реагираат дека некогаш поради чопорите кучиња не можат слободно да се движат по улица и бараат да се преземат мерки. Реакции особено има од населението во делот на автобуската станица, зградите кај големиот пазар, околината на градскиот парк и др.

За проблемот одговор побаравме од градоначалникот Арбен Таравари. Тој вели дека општината преку ангажирање оператори врши третман на животните, но дека се носат кучиња од други градови и затоа ги има во толкав број низ улиците.

„Ова е проблем којшто го има и во повеќето држави околу нас, и во другите градови и во нашиот град. Ние континуирано ги третираме преку избрани компании, се стерилизираат огромен број кучиња. Само оваа година опфатени се околу 450 кучиња, минатата година исто толку. Сепак повторно има многу кучиња скитници. Како би го објасниле ова, освен дека се носат од други градови. Би рекол имаме дискоординација со полицијата, која има обврска ако се носат од други градови, да се открие тоа, да се стопира.“, кажа градоначалникот.

Од СВР Тетово пак, велат дека кај нив никој до сега не пријавил појава на транспортирање и истоварување кучиња скитници на гостиварското подрачје. „Нема таква пријава, ниту од поединец, ни од некоја организација или институција. Таков случај не забележале ни полициските служби кои секојдневно патролираат и се на терен“, подвлекоа од полицијата.

Трајно решение Таравари гледа во отворање на регионален центар за третман на бездомни животни. „Единствено решение е регионален полошки центар за кучиња, којшто ќе има капацитет за третман на минумим 1.000 кучиња, инаку нема да биде одржливо ниедно решение бидејќи кучињата се носат од една општина во друга.“, оценува тој.

Изминатиов период беа пријавени десетина напади од кучиња скитници, на улиците „Мара Угринова“ , „Илинденска“ , „Живко Брајковски“ и други локации.