Таравари: „Лани на 13 февруари Гостивар ја доживеа најголемата трагедија, да не се повтори“

„Минатата година на овој датум се случи најголемата трагедија за Гостивар. Загинаа 16 граѓани од Гостивар и гостиварско, а многу беа повредени. Од повредените, за среќа денеска сите се добри. Мене ме радува што и во Меморијалниот марш имаме жена учесник, која била патник во автобусот. Пред околу две недели група на граѓани дојдоа кај мене и ми ја кажаа иницијативата за овој марш. Ние како општина го поддржавме, затоа што со целото срце и душа сметаме дека тоа е достоен начин да им оддадеме почит и да упатиме порака – Да не се повтори нешто вакво ниту во Гостивар, ни во било кое друго место“, изјави градоначалникот на Гостивар, Арбен Таравари на Меморијалниот марш за несреќата кај Ласкарци.

Маршот започна рано утрово, од местото на несреќата и се одвива до Гостивар. Групата од 70-тина учесници од различни националности и сите возрасти пешачи околу 55 километри.