Таравари на средба со пензионирани наставници: Тие ни даваат важни животни лекции, да покажеме достојна почит

По повод престојниот Ден на албанското образование, 7 Март, општинското раководство на Гостивар го посети ОУ „Исмаил Ќемали“, каде се одржа средба со пензионирани просветни работници.  Да ги почитуваме и вреднуваме просветните работници како што заслужуваат, порача градоначалникот на Гостивар, Арбен Таравари.

„Почестен сум што сум овде, да се сретнам и поразговарам со пензионираните наставници, кои придонеле многу за развојот на децата, а и за целото општество. Јас сум учел во ова училиште и нормално првите импресии и формирањето на карактерот на човекот се случуваат во првите 7 до 10 години од животот. Се сеќавам на многу совети што ни ги давале наставниците и учителите за животот. Не можам да го заборавам учителот Селман Халиси, кој беше еден од подобрите во Гостивар и многу други кои ете и денес беа присутни, како пензионери. Нивните совети беа значајни за нашата личност и животот понатаму.“, рече градоначалникот.

Директорката на училиштето Шпреса Усеини во своето обраќање истакна дека неопходни се промени кои ќе донесат подобар статус на просветните работници. „Состојбите не се како порано. Учителите и наставниците не се вреднуваат и не се почитуваат доволно. Но, се надевам дека со законските промени кои ќе следат после 30 години, ќе има чекор напред да се подобри ситуацијата, да се постигнат европските и светските стандарди“, рече директорката.

Децата се најискрени и најреални затоа е посебно задоволство да се работи со нив, подвлече актуелната раководителка на општинскиот сектор за образование Аслијан Снопче, која повеќе години има работено како професор во средно училиште. „Горда сум на професијата и повторно би се вратила да ја работам. Децата се најискрени и најреални, и секогаш го заслужуваат најдоброто“, рече Снопче.

Традиционалната заедничка прослава на 7 Март годинава во Гостивар ќе изостане поради ковид пандемијата.