Таравари: Поставени се камери и осветлување на Русино

Градоначалникот на Гостивар, Арбен Таравари преку својот фејсбук профил објави дека завршило монтирањето на камери и јавно осветлување на Русино, со што општината ги исполнила сите барања на граѓаните за привремено решевање на проблемот.

„Одлуките кои произлегоа од јавната дебата за привремено решавање на проблемот со депонијата Русино се целосно спроведени. Вчера заврши вградувањето на безбедносните камери и јавното осветлување во и околу депонијата. Претходно, Општина Гостивар ангажираше компании за обезбедување кои ќе дежураат 24 часа на ден за да спречи намерното подметнување пожар, а има испратено и соодветни барања и претставки до Владата, Министерството за внатрешни работи и Државниот инспекторат за животна средина. Секогаш во поддршка на иницијативи и на страната на граѓаните за општото добро!“, напиша градоначалникот.

Блокадата на Русино, која првично требаше да заврши на 12 август, беше продолжена за 10 дена и ќе трае до 22 август. Граѓанската иницијатива „Стоп Русино, чист воздух за Гостивар“ се организира во смени пред рампата што води кон Русино и се пропуштаат само камиони на гостиварски Комуналец.