Таравари се надева на мнозинство и тврди дека советници од ДУИ сакаат да ја напуштат партијата

По оставката на Весел Мемеди и излегување на неговата партија НДП од владеачката коалиција СДСМ-ДУИ на централно ниво, се покрена прашањето во кој правец ќе се движат коалицирањата локално во Гостивар. НДП има два советника во општинскиот Совет, кои до сега го поддржуваа мнозинството формирано од ДУИ и СДСМ. Ќе има ли ново прегрупирање и дали мнозинството ќе „падне“ во рацете на Алијанса за Албанците?

Запрашан на оваа тема, денес градоначалникот Арбен Таравари одговори дека е оптимист, но за сега не може со сигурност да каже ништо конкретно.

„Секој сака да има мнозинство во Советот и секако дека тоа ни е многу важно. Ние, нормално ќе се обидеме да формираме мнозинство, и кога ќе има конкретни новини ќе ја известиме јавноста. Јас сум оптимист дека тоа ќе се случи. Гледам дека има страшна ерозија и во ДУИ, има советници од ДУИ кои се под страшен притисок, затоа што сакаат да ја напуштат партијата. Но, ќе видиме што ќе се случи.“, изјави Таравари.