Таравари: Сите патишта се проодни, реагираме на секое барање од месните заедници

Во текот на вчерашниот ден гостиварскиот регион беше зафатен со поинтензивни врнежи од снег, кои со намален интензитет продолжија и денес. Иако веќе календарски е пролет, сообраќајот се одвива во зимски услови, по влажни коловози.

На територијата на Општина Гостивар сите патни правци се пороодни, а екипи интервенираат на терен од вчера попладне, рече градоначалникот Арбен Таравари.

„Од вчера го ангажиравме операторот со кој имаме договор, веќе од 15 часот после пладне почнаа да работат на чистење на снегот, посебно во планинските села. Во градот беа ангажирани екипи на јавните претпријатија за паркови и зеленило како и „Комуналец“ по улиците, посебно со фрлање сол. Во редовна комуникација сме со месните заедници, нема некои поголеми забелешки. Нормално, секогаш кога врне снег има одредени незадоволства, генерално мислам дека до денеска е менаџирано релативно добро. Нормално локалната опозиција и еден камен да има на пат, ќе го направат тоа како да е огромна пречка. Но, сите патишта на територијата на Општина Гостивар се проодни и за секое јавување од месните заедници, сме интервенирале и веднаш сме праќале екипи да расчистат“, изјави градоначалникот.

Метеоролозите најавија повремени послаби врнежи за утре, со ниски утрински температури и засилен ветер.