Таравари со апел до граѓаните и полицијата да бидат поширокогради и гостопримливи кон иселениците

Во пресрет на помасовното доаѓање на печалбарите, градоначалникот на Гостивар Арбен Таравари испрати апел до граѓаните и до полицијата во кој побара да се покажат поширокогради и погостољубиви кон иселениците. Ако недисциплинираното однесување во сообраќајот немало посериозни последици, тогаш според Таравари граѓаните требало да бидат потолерантни, а полицијата да делува превентивно, за да нема потреба од казни.

„Иселениците престојуваат само неколкудена во родниот крај, и во тие денови,  трошат и инвестираат толку многу пари што ја држат во живот  економијата на државава. Ако мал дел од нив, во главно помладите, не се доволно дисциплинирани во сообраќајот, и заедно со други млади од нашиот град  се однесуваат на начин кој потешко можат да го прифатат постарите генерации, сепак треба да бидеме малку поширокогради  и потолерантни, сé додека нивното однесување не остава последици, или не претставува некоја посериозна повреда на законот и нормативите. Упатувам апел до Полициската станица – Гостивар, односно до командирот на Полициската станица,  да ги мобилизира што поефикасно полициските службеници да бидат на ниво на задачата, повеќе  да влијаат превентивно и што повеќе да асистираат за успешно справување со гужвата во сообраќајот, без да се има потреба за казнени мерки.“, наведува градоначалникот.

Во зимската сезона на престој на иселениците во родниот крај, Таравари преку отворено писмо до командирот на ПС Гостивар упати слични барања за поголема толеранција и коректност кон печалбарите.