Таравари: Условите на ВМРО-ДПМНЕ се конфузни и надвор од реалноста

„Алијансата за Албанците внимателно ја анализира новонастанатата состојба што уследи по средбата меѓу премиерот Димитар Ковачевски и претседателот на ВМРО-ДПМНЕ, Христијан Мицкоски. Размената меѓу двете најголеми македонски партии со понуди и контрапонуди за гласање на уставните промени, директно влијаат и на интересот на Албанците. “, изјави денес на прес конференција во Гостивар претседателот на АА, Арбен Таравари и најави дека до крајот на неделата раководството на партијата ќе одржи состанок и ќе излезе со конечен став.

Тој ги оцени поставените условите на опозициската партија се нереални и неостварливи.

„Иако нивните услови се конфузни и надвор од реалноста, ја поздравуваме новата волја на ВМРО-ДПМНЕ да гласа за уставните измени. Како што сите знаеме, нашата преговарачка рамка одобрена од 27-те земји-членки на ЕУ експлицитно го условува отворањето на преговорите со усвојување на уставните измени. Значи, првин усвојување на уставните измени, а потоа отворање на преговорите. Затоа, оценувам дека условот на македонската опозиција за суспензивни уставни измени е едноставно неостварлив, бидејќи е во спротивност со преговарачката рамка на ЕУ. Уставните измени треба да стапат во сила најдоцна до моментот на одржување на Втората меѓувладина конференција.“, рече Таравари.

Во однос на условот на ВМРО-ДПМНЕ за излез на албанските партии од владата, тој нагласи дека за неговата партија не биле важни изборните калкулации, туку завршувањето на европскиот процес и перспективата на граѓаните.

„Алијансата за Албанците реши да влезе во владата заради процесот, но ќе се адаптира во зависност од новите околности, дали во владата или надвор од неа. За нас е важно само завршувањето на процесот и ќе дадеме свој придонес, без услови и без уцени.“, рече Таравари и повтори дека како партија ќе продолжат да се залагаат за отстранување на 20 проценти и воведување на албанскиот јазик во Уставот на земјата.