Таравари за обвинувањата од ДУИ: Работиме законски, воведуваме ред во урбанизмот

На обвинувањата на неговите политички противници од ДУИ, дека поддржува дивоградби кои се градат на простор наменет за спортски терени, градоначалникот на Гостивар Арбен Таравари одговори дека откако дошле на власт работат на воведување на ред во урбанизмот и дека не се издаваат дозволи незаконски.

„Дозвола за градба не е издадена за ниту еден објект кој не ги исполнува сите услови. Доколку има потреба инспекциските служби излегуваат на терен, вршат увид, прават записник и ако се утврдат незаконитости се преземаат соодветни мерки. Во однос на обвинувањата дека граделе мои роднини, јас можам да кажам дека во Гостивар има четворца инженери и шест доктори со презиме Таравари и тие си имаат приватни фирми. Зарем јас треба да ги уништам?  А ако се најде било каква поврзаност на општината со овие фирми и било какви нерегуларни дејствија за заеднички интерес, слободно нека ме пријават.“, изјави градоначалникот.

Таравари посочи дека токму тие што го обвинуваат, го кочат развојот на општината и прават опструкции. „Се случува во Комуналец, управниот одбор избран од ДУИ и СДСМ да не го гласа  тримесечниот извештај на директорот. Со тоа се блокира работата и зафати кои се важни за претпријатието. А Комуналец никогаш повеќе не работел како сега. Се соочуваме со пречки и опструкции по сите основи“, изјави првиот човек на Гостивар.