Течат подготовките за прослава на Водици во Гостивар

Големиот христијански празник Богојавление-Водици се прославува во сабота, 19 јануари. Во Гостивар течат последните подготовки за прославата, а иницијативниот одбор со голема посветеност работи на дефинирање на деталите за целокупната манифестација.

По повод празникот, света литургија ќе биде отслужена во соборната црква „Пресвета Богородица” од каде ќе тргне и литијата во 11 часот. Чинот на осветувањето и положувањето на светиот крст во водите на Вардар, точно напладне ќе го изврши, Митрополитот тетовско-гостиварски, господин Јосиф.

Иницијативниот одбор ги поканува сите христијански верници да бидат дел од прославата на Водици во Гостивар, за да помогнат во зачувување на традицијата. Воедно ги повикува заинтересираните за вадење на чесниот и животворен крст од водите на реката Вардар, да се пријават на тел. број ‎078-998-554. До сега се пријавени дваесетина млади гостиварци.

Денес, на празникот Василица како што налагаат традициите, во дворот на црквата Пресвета Богoродица во Гостивар, се сучеше врвката со која се врзува крстот.