Тепачка и напад со остар предмет меѓу ученици во медицинското училиште во Гостивар

Регистриран е нов инцидент во круг на гостиварско училиште. Ова е петто по ред нарушување на јавниот ред и мир во и околу училиштата на територијата на Гостивар, во новата учебна година. СВР Тетово информира дека вчера (17 октомври) во 16 часот и 30 минути, 42 годишниот Ф.Ј. од гостиварска Симница пријавил дека околу 13 часот неговиот 17-годишен син, ученик во средно училиште во Гостивар, бил нападнат со остар предмет од малолетник од истото училиште, кој претходно физички се пресметувал со други ученици во училишниот двор.

Полицијата соопшти дека се преземаат мерки за расчистување на случајот.

Насилството меѓу учениците беше една од темите на денешниот состанок, што се одржа во општината на кој учествуваа претставници од училиштата, полицијата и локалната самоуправа.

„Проблемите претежно се случуваат во средните училишта, иако полицијата е присутна и на големите одмори и при менување на смените, гледаме дека не е се` како што треба. Вчера на пример, имало тепачка во средното медицинско училиште. Мора да делуваме заеднички, ваквите појави да се превенираат“, изјави Аслијан Снопче од општинскиот сектор за образование.