Тешко повреден велосипедист во несреќа во Долна Бањица

Едно лице завршило на скопските клиники по сообраќајна несреќа која се случила утрово, околу 9 часот и 10 минути, во гостиварска Долна Бањица, во непосредна близина на  гробиштата. Од полицијата информираат дека во несреќата учествувале, автомобил „Тико“ со гостиварски регистерски таблици, кој го возел 48 годишен жител на Долна Бањица и 58 годишен велосипедист од истото место.

При судирот, велосипедистот се здобил со тешки телесни повреди на нозете. Медицинска помош му била укажана во гостиварската болница, по што итно бил пренесен на скопските клиники.
По овластување на јавен обвинител, увид извршила екипа од Полициската станица Гостивар од каде велат дека се утврдува причината и околностите во кои се случила несреќата.
Деновиве на полошкото подрачје зачестија сообраќајните несреќи, во кои непосредни учесници се велосипедисти. Секторот за внатрешни работи Тетово повторно ги  советува и им укажува на возачите на товарни и патнички возила повеќе да внимаваат на другите учесници во сообраќајот, како мотоциклисти, велосипедисти, пешаци и да не возат пребрзо. Поголема внимателност им се препорачува и на велосипедистите и пешаците – целосно да се придржуваат на сообраќајните правила и прописи, особено онаму каде што нема велосипедски патеки или тротоари.