Гостиварците The Protagonist со нов сингл и видео запис

The Protagonist, еден од најпрогресивните бендови на регионалната музичка сцена, го објави вториот по ред сингл од новиот албум во подготовка, “Mono Maniac” со видео запис.

„Mono Maniac“ е енергична композиција со моќен гитарски риф како мотив, исполнетa со топли, но во исто време продорни вокали, како и доста енигматична и суштинска лирика. Финалниот микс и мастеринг на песната е изработен од познатиот британски саунд инжинер Simon Heyworth кој соработувал со Nick Cave, King Crimson, Goldfrapp, Mike Oldfield, Ennio Morricone….

“Оваа песна е будилник… она што сме е поголемо од нашите разлики, поголемо од нашите така наречени лидери од секакви бои. Лирично, песната е напишана за состојбата на човековиот дух базиран на новите технолошки дизајни, кои како последица произведуваат нов вид на социопати, психопати со коишто не можете да имате логичка или емоционална човечка конекција, комуникација … но сепак, некако на крај тие донесуваат одлуки за локални или глобални проблеми!? Овој тип на луѓе мислат дека сите други се слаби и треба да се контролираат на овој или оној начин. Оваа песна допира длабоко, поставува прашања и го критикува менталитетот на напредокот базиран ексклузивно врз технологијата, и колку лесно луѓето се впуштаат во светот на едно-димензионални спектакли. Свет во кој образовани луѓе не можат да направат разлика помеѓу лажни и вистински вести, свет во кој имбецилите се слават и медиумските спектакли се дизајнирани на таков начин што го убиваат сето она што значи човек во нас: компромис, добрина, љубов, вредности кои се сменети со површни идеи. Оваа песна е будилник, и време е да го разбудиме човечкото во нас, пред да завршиме како нули и единици.”, порачува R.S.Rush, вокал во бендот и автор на текстот.

Првиот сингл “Love Stream”, од новиот албум наречен “Absolute Attitude” беше промовиран и на каналот на МТV-Adria.

Сите досегашни синглови од деби албумот на гостиварците The Protagonist под наслов „No Exit Museum“ влегоа во Топ 20 на MTV-Adria, а албумот имаше и повеќе рецензии меѓу кои и во списанието Rolling Stone со позитивни критики.

Бендот, кој го сочинуваат R.S.Rush и Кузман Маркоски, досега има настапувано на повеќе фестивали со енергични и впечатливи изведби во живо.