ТикТок во Албанија ќе биде блокиран деновиве, најави Рама

Албанскиот премиер Еди Рама изјави дека платформата ТикТок ќе биде затворена деновиве, додавајќи дека „причина за тоа е што ТикТок е токсичен за децата“ и оти, според него, 95 отсто од родителите во Албанија се преплашени од платформата.

– За неколку дена оваа платформа повеќе нема да биде достапна во Албанија, ТикТок е многу токсичен, особено за децата, а 95 отсто од родителите во Албанија се преплашени. Суспензијата сè уште не е завршена, проценуваме дека ќе се направи во рок од неколку дена. Ние, исто така, се вклучуваме во конструктивен дијалог со нив, наведе Рама.

Тој посочи дека „ќе биде затворен и повторно отворен за период додека ТикТок ги исполни сите наши барања“.

Блокирање на платформата ТикТок, Рама ја најави на средба со родители и наставниците на 21 декември минатата година, за новиот план за мерки за безбедност во училиштата, по убиството со нож на 14-годишен ученик во Тирана од негов соученик.

– Ги направивме сите наши истражувања од технолошката страна и ќе ни требаат шест до осум недели почнувајќи од почетокот на следната година и за една година целосно ќе го затвориме за сите. Во Република Албанија повеќе нема да има ТикТок. Потоа во текот на оваа година ќе видиме какви мерки ќе преземат другите земји или како може да реагира самиот ТикТок. Тоа е наша должност, рече тогаш Рама.

Веднаш по најавата реагираше лидерот на опозициската Демократска партија и поранешен албански премиер, Сали Бериша, кој одлуката на Владата ја нарече „екстремен чин на цензура“.

Рама одлучи да ја забрани платформата ТикТок само затоа што паѓа неговиот рејтинг на социјалните мрежи, како што покажуваат сите анкети. Тоа го прави поради изборите, што го потврдува со најавата дека забраната ќе биде една година, напиша Бериша на социјалните мрежи.