Топлотен бран – Бремените жени и хронично болните да се ослободат од работа

Целата територија на Македонија од денес до сабота ќе биде во портокалова фаза на високи температури. Министерството за здравство, излезе со препораки бремените жени и хронично болните лица на возраст над 60 години да бидат ослободени од работни обврски. „На работодавците им се препорачува да го реорганизираат работното време во насока на избегнување активности на отворено во периодот од 11 до 17 часот. Исто така препорачуваме да не се одржуваат спортски активности на отворено во периодот од 11 до 17 часот, а особено се препорачува на установите за згрижување на децата (детски градинки) да не ги изнесуваат децата на отворено и да не практикуваат физичка активност во истиот период“, наведуваат здравствените власти.

Министерството ги потсетува граѓаните од целата држава дека е потребно да ги почитуваат општите препораки за заштита од високите температури: заштита од директна сончева изложеност, избегнување престој на отворено во периодот од 11 до 17 часот, носење светла и лесна облека, консумирање лесна храна и течности, хигиенски начин на подготовка на храната и редовно земање на терапијата кај хронично болните лица.

Поради повисоките температури потребен е и повисок степен на внимание при подготовка и консумирање на храната.