ТОПЛОТЕН БРАН утре и во сабота! Бегајте под сенка или седете во климатизирани простории

Според метеоролошките прогнози, во целата земја за време на продолжениот празничен викенд ќе има топлотен бран со многу високи температури. Изразено топло време посебно ќе има во петок и сабота (2 и 3 август), со температури до 41 степен.

Лекарите препорачуваат внесување поголемо количество течности, најдобро обична вода, а да се избегнуваат алкохолните пијалаци. При влегување во возило, потребно е тоа одреден период да се проветри. Во текот на ваквите екстремно топли денови, пожелно е да се престојува во затворени простории, пред сè климатизирани, а при неопходен престој на отворен простор во овој период, да се најде можност за почести одмори под сенка.

Дирекцијата за заштита и спасување информираше дека покрај основните препораки за однесување во вакви услови, согласно Законот за заштита и спасување, презема и мерки и активности за превентивно делување за заштита од можни шумски пожари и други пожари на отворен простор.
Со оглед на празничниот продолжен викенд и зголемената посетеност на шумите и излетничките места, ДЗС апелира до локалната самоуправа и граѓаните да внимаваат кога се на отворено:
-да не се фрлаат цигари и догорчиња;
-да не се фрла стаклен отпад и стаклени шишиња;
-да не се пали оган и скара на отворен простор и шума;
-да не се пали отпад и друг горлив материјал;
-да не се палат стрништа и меѓи.
-ако се забележи пожар веднаш да се извести Територијалната противпожарна единица на бесплатниот телефонски број 193.