Традицијата на голема прослава на Преображение во Гостивар продолжува, подготовките завршени

Со голема радост и срца полни вера во Бога, православните верници од Гостивар и гостиварско се подготвуваат за одбележување на празникот Преображение Христово кој се слави во сабота, 19-ти август. Традицијата на прославување со голем собир, благословување на грозјето и народна веселба во манастирот во изградба „Свето Преображение Христово“ во гостиварската населба Циглана продолжува.

Подготовките за организација на празнувањето се завршени и од Иницијативниот одбор упатуваат покана до гостиварци како и секоја година, за масовно и достојно чествување на Преображение.

Во очи празникот, во петок навечер со почеток во 20.30 часот се организира музичка вечер со Наум Петрески, Зуица Лазова, Влатко Лозаноски и Фантастик бенд. На денот на празникот во сабота наутро ќе се изврши водосвет, благословување на грозјето и ќе се пресечат кумските лебови, по што од 10 часот ќе следува народна веселба со Агресив бенд.

Потсетуваме дека деновиве заврши асфалтирањето на патот до манастирот, со што пристапот е значително олеснет.

Преображение по својата смисла и значење е еден од централните христијански празници. Се базира на настанот на Христовото преобразување, односно покажување на неговата божественост пред своите најблиски ученици на Таворска Гора, кратко време пред неговото страдање во Ерусалим. Традициите налагаат на Преображение за прв пат да се јаде грозје, откако свештеникот ќе го благослови во знак на благодарност кон Бог за дадените плодови на земјата.