Традицијата продолжува – масовна прослава на Божиќ во Гостивар

Православните верници денеска го прославуваат големиот христијански празник, денот на раѓањето на Исус Христот – Божиќ. Утрово, црквата „Успение на Пресвета Богородица“ во Гостивар беше исполнета со верници од сите возрасти, кои ја споделија празничната радост. Во овој свет храм се одржа централното одбележување на Божиќ. Со Светата Архиерејска Литургија чиноначалствуваше Митрополитот тетовско-гостиварски г.Јосиф, во сослужение со свештенослужителите од гостиварското архиерејско намесништво.

Традицијата на прославување на рождеството христово во Гостивар се негува скоро три децении. „Не` радува што традицијата секоја година се проширува, не само во црквата „Пресвета Богородица“, туку и низ малата во Гостивар. Самиот празник Божиќ значи дека ние треба да го љубиме Господа, а тој пак, ни возвраќа со здравје и мир. По мое длабоко убедување, црквата е место кадешто престануваат партиските спротивставености и сите треба да се сплотат за доброто на Македонија.“, рече новинарот Киро Кипроски, еден од иницијаторите на божиќната традиција во Гостивар.

Празнични честитки, како дел од организацискиот одбор упати и д-р Никола Петровски: „Многу ми е мило што сме сите вака собрани на овој голем празник. На сите им посакуваме најпрво здравје, благосостојба во семејството, радост и бериќет“.

Граѓаните кои присуствуваа на литургијата, со молитва за мир и спасение, запалија свеќи и оставаа дарови. На крајот од литургијата, оние кои ги постеле шестнеделните пости се причестија.

„Христос се роди-Навистина се роди!. Имајте радосен и благодетен празник. За многу години.“, порача Владиката г.Јосиф, кој потоа ја благослови заедничка трпеза во дворот на црквата, подготвена од овогодинешните кумови.