Традиционален фолклорен концерт во Гостивар по повод Велигден на ГАКУД „Браќа Ѓиноски“

Во пресрет на големиот христијански празник Велигден, традиционално на Велики Четврток, гостиварското градско аматерско културно уметничко друштво „Браќа Ѓиноски“ одржа концерт пред домашната публика во Центарот за култура „АСНОМ“. Со ова целовечерно дружење низ фолклорот и народната македонска музика, друштвото ја отвори годинешната концертна сезона.

Публиката имаше можност да ужива во 70 минутна програма на сплетови на народни ора и песни, во изведба на фолклорната секција, оркестарот, најмалите членови на друштвото, како и пејачите Мирослав Крстески, Јовица Николоски и Ѓурѓица Николоска.

Во воведниот дел на концертот се направи кратко потсетување на историјатот и функционирањето на друштвото, како најверен чувар на македонските традиции во Гостивар.

„Друштвото е формирано во 1950-та година. Располага со сала за играње, просторија за носии и канцеларии. Располага со три комплети на машки народни носии и два комплети на женски народни носии. Од своето постоење има сопствен оркестар, а актуелниот состав функционира од 2006-та година до денес. Од своето формирање ГАКУД „Браќа Ѓиноски“ има дадено 702 концерти на народни песни и игри. Во последните три години има одржано 38 концерти во Гостивар, Маврово Ростуше, Македонски Брод, Тетово, Куманово, Брвеница и околни села во гостиварската општина. На својот репертоар има 8 сплетови на игри: Тренесица, Водарки, Повардарие, Жетварка, Комитско, Шопска петорка, Беранче и сплет на игри од Егејска Македонија“, беше речено во најавата.

Концертот го организираше националната установа Центар за култура “АСНОМ” со поддршка на Министерството за култура.

Во периодот што следи гостиварското друштво ќе има настапи во Македонски Брод, Трница и Брвеница.