Трагедија: Осумгодишно дете од Гостивар загина во несреќа во Албанија

Во тешка сообраќајна несреќа што попладнево се случила во Албанија на патниот правец Елбасан-Пеќин животот го загубило осумгодишно дете од Македонија, а пет лица се повредени. Министерството за надворешни работи информираше дека жртвата е од Гостивар.

– Сообраќајната несреќа се случила на патниот правец Елбасан-Пеќин, кај селото Паулеш. Во несреќата учествувал автомобил марка „голф” со гостиварски регистарски таблички управуван од македонската државјанка Т.Б. кој се движел од Елбасан кон Пеќин и автомобил управуван од А.Х. жител на албанскиот град Каваја – пренесува TVKlan.al.

Во несреќата со повреди се здобила мајката на починатото дете Т.Б. и нејзината 11 –  годишна ќерка, како и А.Х. и две лица кои биле во неговиот автомобил. Пренесени се во болница во Елбасан и според последните информации се надвор од животна опасност.

Причина за несреќата е влажниот коловоз и неприлагодена брзина на движење на автомобилот со македонски ознаки. Според медиумите местото каде што се случила несреќата е една од неколкуте црни точки на оваа делница.