Трамп ги одложи царините за повеќето земји на 90 дена, но ги зголеми за Кина

Само еден ден пред да стапат на сила новите царини, американскиот претседател Доналд Трамп објави дека нивната примена ќе се одложи за 90 дена – но ова одложување не важи за сите земји.

Кина веднаш се соочи со нов удар, откако царините за кинескиот увоз беа зголемени од 104 на 125 отсто. За другите држави, според новата одлука, ќе се применува царина од 10 отсто.

„Врз основа на непочитувањето на Кина кон глобалните пазари, ја зголемувам царината што САД ѝ ја наплатува на Кина на 125 отсто и тоа веднаш стапува на сила“, напиша Трамп на својата социјална мрежа Truth Social.

Кина возврати со воведување царини од 84 отсто на увозот на американска стока и ја обвини американската администрација дека се однесува како „насилник“. Кинеското Министерство за трговија ги оцени мерките како „неразумни“ и „типична манифестација на едностран економски притисок“.

Новите американски царини беа најавени во три фази: прво 20 отсто во март, потоа дополнителни 34 отсто минатата недела, а од 9 април требаше да се додадат уште 50 отсто.

Вашингтон објави листа со 60 земји што ги смета за „најголеми трговски прекршители“, кои ќе се соочат со царини во распон од 11 до 50 отсто.

Иако Македонија не е директно наведена, овие глобални трговски тензии би можеле индиректно да влијаат и врз нашата економија, особено во делот на извозно ориентираните компании и синџирите на снабдување.