Трет Меморијален турнир „Д-р Трајче Нешковски“ во Гостивар: Луѓето како него оставаат траен белег!

Тридневните активности кои во Гостивар се организираат во спомен на Д-р Трајче Нешковски, се заокружуваат денес со Меморијален турнир во мал фудбал. Настанот, кој се одржува во спортската сала на гостиварската гимназија почна претпладнево, а му претходеше ревијален натпревар на младинските екипи на КК Гостивар.

„Дојдовме сите на едно место, онака како што знаеше да не‘ собере Трајче. Овие две години откако Трајче трагично не‘ напушти, не‘ научија дека тој никогаш нема да биде заборавен, зошто луѓето како него оставаат траен белег во времето во кое живееле. Нам, ни остана обврската и должноста да се сеќаваме на неговите зборови, лекции и добрини и да го сочуваме од заборав неговиот лик и дело. Ако човек живее онолку колку што се спомнува тогаш Трајче живее секој ден“, беше речено на отворањето на турнирот.

Присутните во салата имаа можност да го проследат и видеото со кое се потсетија на неговата биографија, живот и дело како човек, пријател, лекар, и му оддадоа искрена почит со неколкуминутен громогласен аплауз.

На турнирот учествуваат 8 екипи составени од другари, сопартијци, соработници на Нешковски: СДММ централа, СДСМ централа, ЛК СДММ Гостивар, УМС Гостивар, Другарите на Трајче, Малеарди, Другари Исток, Другари Запад.

Меморијалниот турнир, кој се одржува по трети пат, традиционално има хуманитарен карактер и парите собрани од влезници и донации ќе бидат наменети за помош на социјално загрозени семејства.

Активностите ги организира Хуманитарното здружение „Д-р Трајче Нешковски“