Tри лица со повреди завршиле во гостиварската болница

Полицискиот билтен бележи три одделни случаи на гостиварското подрачје вчера (14 септември) во кои биле повредени исто толку лица.

„Околу 9 часот и 45 минути, работејќи на изградба на објект на улица „Балиндолска“ во Гостивар, 63-годишниот Н.А. од гостиварски Градец се здобил со тешки телесни повреди, констатирани во гостиварската Општа болница „Ферид Мурад“. Околу 13 часот во болницата бил донесен 43-годишниот Е.М. од гостиварска Долна Бањица со повреди со кои се здобил собирајќи старо железо на улица „Иљо Антевски-Смок“ во Гостивар. Вчеравечер околу 23 часот и 30 минути во СВР Тетово пријавено е дека 61-годишниот С.С. од Скопје, кој престојувал во викендица во мавровската населба Крстови 2, се повредил и бил пренесен во гостиварската болница“, стои во соопштението од СВР Тетово.