Трибина на СДСМ во Гостивар: „Едно општество за сите е најдоброто што и‘ се случило на нашата држава“

СДСМ денес одржа трибина со граѓаните во Гостивар, под мотото „Најдоброто за нашата општина“.

Потпретседателите на партијата, Оливер Спасовски и Венко Филипче пред присутните во обраќањата се осврнаа на проектите и инвестициите кои ги спроведувале во ресорите што ги водат, а упатија критики до опозициската ВМРО ДПМНЕ.

„Ова е континуитет на нашата комуникација, сакаме да ги слушнеме потребите на граѓаните, да ги вклучиме во политиките на носење на одлуките, затоа што не веруваме во наметната одлуки. Проблемите да се слушнат од граѓаните директно од терен, а  решенијата често доаѓаат токму и од граѓаните. Така работевме во Министерството за здравство и затоа имаме успеси. Ги зголемивме платите на специјалистите. Се помалку лекари сакаат да заминат во странство, лекарите специјализанти се многу подобро платени. Инвестиравме во болниците. После 70 години нашите пациенти имаат можност да добијат модерна здравствена заштита. Во Гостивар се реновираше хируршкото одделение, се купи новиот апарат за рентген, а за непол месец ќе добие магнетна резонанса. Сега слушаме дека ВМРО ДПМНЕ ќе се ребрендирале. Ќе станеле партија на сите граѓани. Не може ВМРО да биде партија за сите граѓани кога се синоним за поделба, волкот го менува влакното, но карактерот не го менува. Изборот е јасен – на едната страна е нашето одговорно транспарентно работење, на другата страна е ВМРО, партијата која штити криминалци и промовира насилство.“, нагласи Филипче.

Спасовски истакна дека концептот „Едно општество за сите“ може да биде пример за целиот регион.

„Ако погледнеме наназад овие 4 години ќе видиме дека имаме многу решени прашања, реализирани проекти, отворени врати во светот, почит кон луѓето, граѓаните.  Развивме свои концепции кои претставуваат иднина не само за нашата земја, туку за целиот регион. Гостивар е најдобар пример за она што го започнавме и градиме, концептот „Едно општество за сите“. Тој концепт е најдоброто нешто што се има случено на државата. Сите сметаа дека е осуден на неуспех, но напротив докажавме дека само така можеме да одиме напред. Со тој концепт секој еден се чувсвствува свој на своето. Кога зборуваме за инвестиции треба да кажеме дека 7 милиони евра се вложија во инфраструктурата на Гостивар и гостиварско, односно регионални и магистрални патишта околу Гостивар и општините. Што се однесува до ВМРО, јас не верувам, а и граѓаните не верувааат во новите концепти на ВМРО и Мицкоски. Како и со која боја можат да се прикријат 11 милијарди евра кои беа украдени од државата, со која боја ќе ја скријат Белата палата и раскошот, станаа партија побогата од партијата на Меркел и сега кажуваат дека ќе прават нешто во интерес на граѓаните.“, потенцира Спасовски.

На трибината зборуваа и  Фаница Николоска , пратеничка на СДСМ и – Хилал Беќири, членка на Извршниот одбор на ОО СДСМ Врапчиште.

„Се наоѓаме во најубавиот дел од нашата држава, не само по природните убавини туку и по луѓето, Македонци, Албанци, Турци, Роми, Срби сите сплотени заедно. Гостивар е пример на соживотот, и на дело покажува дека концептот што го промовира СДСМ за едно општетсво за сите е успешен. Зборувајќи за реализирани проекти и мерки нагласи дека државата и во услови на пандемија покажа дека има капацитет да се справува со проблеми и предизвици кои доаѓаат ненадејно. Јасно е дека Гостивар е бастионот на СДСМ.“, рече Николоска.

Беќири одржа говор на македонски, албански и турски јазик. „Платформата и програмата на СДСМ „Едно општество за сите“ е авангарда во Западен Балкан, претставува решение за многу детсруктивни програми, истовремено е инвестиција за напредок и социјален развој.“, рече таа.

Пред почетокот на трибината ОО СДСМ Гостивар со раководството на партијата прошетаа низ Гостивар посетувајќи ја црквата Пресвета Богородица, не пропуштајќи ја можноста да ја пробаат и познатата гостиварска баклава.