Трибина во Гостивар: Сите да ги поддржиме болните од канцер, тие ја водат најголемата животна битка

Секој поединец да даде своја поддршка и емпатија кон луѓето заболени од канцер. Да го добиваат вниманието на околината и грижата која им е неопходна, додека ја водат најтешката животна битка. Ова беа дел од пораките упатени на вечерашната панел дискусија која се одржа во Гостивар, по повод 4 Февруари, Светскиот ден на борбата против ракот. Настанот го организираше Здружението When in Trouble, а говорници беа лекари специјалисти.

„Нашето здружение се обидува секоја година барем еден ден да им посвети на овие пациенти. Да им покажеме дека не се сами и малку да ја подигнеме свеста за оваа најстрашна болест на денешницата. Не само медицински персонал и не само финансиска поддршка им е потребна, туку секој од нас може да им биде поддршка на болните од канцер. Потребно им е некој да ги сослуша, да соувствува со нив. Затоа, упатуваме апел секој од нас да обрне внимание, доколку има некој што се бори со оваа болест, да му биде поддршка, столб. Тоа се луѓе со чувства кои ја имаат најголемата битка во својот живот и мора да ги поддржиме.“, потенцира претседателката на здружението, Билјана Беловинова.

Лекарите велат дека начинот на живот и секојдневните навики во однос на исхраната, физичката активност и слично, се фактори кои луѓето може да ги контролираат и со правилно постапување, да ги намалат ризиците од рак.

„Одредени фактори не можеме да ги смениме, како што е полот, генетиката, местото на живеење, но можеме да развиеме навики на поголема физичка активност, здрав начин на исхрана, да не пушиме. Тоа не се само ризик фактори за канцер, туку и за кардиоваскуларни болести, дијабет и многу други заболувања. За жал, нашето искуство покажува дека луѓето многу малку го насочуваат вниманието кон превентивата и се обраќаат на лекар кога веќе е доцна, кога карциномот е во напреден стадиум, кога можностите за лекување се помали“, рече ендокринологот Слаѓана Максимоска.

Медицинарите изразуваат надеж дека во блиска иднина ракот ќе биде поразена болест со вакцина за превенција.

„Извикот „Да го победиме канцерот“ е поттикнат од изјавата на американската адиминистрација дека на повидок е епохалниот пронајдок за борба против рак, а тоа е вакцината, која фактички ќе го превенира канцерот, како што навремето беше епохален пронајдокот вакцината против туберкулоза. Целата планета е во очекување на овој пронајдок, цела деценија се најавува и веројатно веќе се гледа светло во тунелот и ќе го прогласиме канцерот како извојувана победа.“, подвлече хирургот Неџати Јакупи.

На панел дискусијата свое обраќање имаше и радиологот Љубица Анастасиевска. Присутните имаа можност и да им поставуваат прашања на лекарите, да побараат мислења и совети, и да споделат искуства.