Трудниците во Гостивар стравуваат од ковид – наместо паника, треба превенција, велат лекарите

Ризиците по здравјето од коронавирусот се повисоки кај бремените жени. Тие заедно со хронично болните и повозрасните, спаѓаат во ранливите категории. Тоа значи дека се поподложни на компликации и посериозни здравствени проблеми.

Сето тоа придонесува за страв и паниката кај трудниците од ковид пандемијата.  Од гинеколошко-акушерското одделение во гостиварската болница потврдуваат дека голем дел од бремените жени стравуваат да не го добијат вирусот. За среќа, во Гостивар досега нема многу корона меѓу идните мајки. Биле потврдени само два случаи.

„Паника секако постои, бремените жени се со послаб имунитет и се поизложени на ризик од било какви вируси, а да не зборуваме за ковид 19. До сега, до нас се обратиле две пациентки, кај кои потоа беше потврден ковид. Тие имаа температура и други симптоми, не беа хоспитализирани на нашето одделение, туку веднаш препратени на клиниката во Скопје, каде имаат посебен протокол. Таму им беше потврден вирусот. Имавме и неколку случаи со пациентки во нашето одделение, сомнителни, кои беа изолирани и тестирани, но кај нив за среќа резултатите беа негативни“, вели  д-р Агим Јакупи, раководител на гинеколошко-акушерско одделение во Гостивар

Наместо паника, треба превенција, порачуваат лекарите. Во одделението постои советувалиште за млади родители. Тука може да се добијат најразлични совети и корисни информации околу бременоста, породувањето, па и заштитата од ковид. Стручните лица велат најважно е да се зајакне имунитетот и да се почитуваат општите антикорона мерки.

„Во ова советувалиште бесплатно може да ги добијат сите совети и се тоа е во корист на здравјето на идните мајки и на бебињата. Секако, прво и најважно во однос на заштитата од ковид е почитување на препораките кои се од Светската здравствена организација, носење маска, растојание, хигиена и намалување на контактите“, нагласи д-р Јакупи.

Инаку, од почетокот на оваа година, до денес во болницата во Гостивар родени се 399 бебиња.