Вести
Царовска во Врапчиште: Од септември се отвора градинка за згрижување 80 деца
Во објектот на основното училиште во Врапчиште се вршат подготовки за отворање нова детска градинка, која се очекува да проработи од септември. Министерката за труд и социјала, Мила Царовска денес беше во посета на местото да го види текот на работите. Обезбедени се четири занимални за престој на децата, кои во наредниот период ќе бидат опремени со инвентар и други потребни реквизити. Градинката е со капацитет од 80-тина деца, и ќе има групи на трите јазици: македонски, албански и турски.
„Во Врапчиште имаме 1347 деца на возраст од 0 до 6 години. Но, опфатот на деца со градинки е нула. И тоа ни се случува во голем дел од нашите рурални општини. Затоа сум среќна што како министер за првпат посетувам, односно ќе отвориме градинка во рурална општина. Оваа градинка е проектирана да опфати 80 деца во четири занимални. Една занимална треба да биде подготвена за дечиња од 0 до 3 години, а три занимални за деца од 3 до 6 години. Групите треба да бидат подготвени за да се организира настава, предучилишно образование, на македонски, албански и турски јазик. Тоа е договорено со општината. И тоа е исто така добар модел за интеграција, едно општество и заедничко живеење, што за мене е посебно важно“, изјави Царовска.
Според градоначалникот на општина Врапчиште, Бајрам Кадрија овој проект ќе биде од голема помош и корист за младите родители.
Министерката најави дека отворањето на нови градинки е зацртано како приоритет во владините програми за наредните години.
„Во програмата на Владата се обврзавме да го прошириме опфатот на деца во градинки и тоа ќе го правиме подеднакво и во рурални и во урбани општини. Токму затоа, до крајот на 2017 година ќе се заврши изградбата и опремувањето на тринаесет детски градинки и ќе имаме зголемен опфат за 682 деца. Оваа тенденција ќе продолжи и во 2018 година. Целта е да обезбедиме рамномерен регионален развој и токму затоа ќе внимаваме и на рурални и на урбани општини, но исто така и на застапеноста на западна, источна, северна Македонија, односно сите региони ќе бидат еднакво покриени и поддржани од Министерството за труд и социјална политика.’’
За опремување на просториите на новата градинка во Врапчиште, Министерството за труд и социјална политика ќе издвои околу 2 милиони денари.
-
Гостиварпред 2 месеци
Курсна листа на НБРМ и приватните менувачници во Гостивар
-
Македонијапред 1 месец
Денеска е Летник
-
Гостиварпред 3 месеци
Се потсетуваме, најсреќните на Водици во Гостивар кои го извадија крстот од Вардар
-
Македонијапред 3 месеци
Србите го слават Свети Сава – Национален празник на српската заедница во земјава
-
Македонијапред 1 месец
Денес е Прочка – Проштевајте и побарајте прошка од оној на кој сте му згрешиле
-
Гостиварпред 2 месеци
Објавен повик за невработени-По 6.000 евра грант за да си отворат бизнис
-
Вестипред 1 месец
Историјат на Осми март – Празник посветен на правата на жените
-
Што, како, каде?!пред 3 месеци
ШОУ: Легендарните „Солза и Смеа“ доаѓаат во Гостивар