Цркви, џамии, стари куќи во Гостивар и селата опфатени во проекти на Конзерваторскиот центар

Црквата „Свети Димитрија“ и медресето во градот, џамии во селата Симница и Равен, традиционални куќи во селото Бродец…Ова се дел од објектите од културното наследство на поширокиот гостиварски регион, кои се опфатени во програмата за работа на Конзерваторскиот центар во Гостивар. Зафатите за нивна реставрација и конзервација значат трајна заштита на културното богатство и отвораат можност за нивна промоција пред посетители и туристи.

Џамијата во Симница е стара околу 120 години, а со проектот првично се предвидува да се заштити кровната конструкција на овој објект. Таму деновиве во посета беше министерот за култура Хусни Исмаили.

„Старата џамија има своја вредност и не треба да биде заборавена, ниту од граѓаните, ниту од Министерството. Затоа и го поддржуваме овој проект, кој првично предвидува реконструкција на кровот, со оглед дека од таму потекнуваат другите проблеми, како протекување, оштетување на ѕидовите и слично. Понатаму, ќе се опфатат и прозорците и подот“, рече Исмаили.

Ва црквата „Свети Димитрија“ проектот за реставрација на покривот целосно заврши, исто како и обновата на фасадата на медресето. Планирани се и други значајни проекти, кои ќе се реализираат откако ќе се заокружат административните и тендерските процедури.

„Чекаме проектите да ја поминат стручната контрола и да бидат отворени тендерите. Тука би ги споменал реставраторските работи на Беговата куќа, џамијата и калето во Равен и други.“, изјави Илбер Зулфиќари, директор на Конзерваторски центар Гостивар.

Конзерваторски Центар во Гостивар ги спроведува овие активности под мотото ”Да ја изградиме иднината со зачувување на минатото”