Црвената пиперка царува на трпезата – Фантастична пита со печени пиперки

Во сезоната на подготовка на зимниците, секако главни се црвените пиперки од кои се прави ајвар, лутеница, се ставаат во кисела варијанта со лук и магдонос и слично. Токму затоа што царуваат на трпезата овој период, денес ви предлагаме да направите Пита со црвени пиперки. Нема да изгубите многу време, ниту да се мачите во подготовката, а резултатот ќе биде прсти да излижеш.

состојки:

500 гр. готови кори за пита

500 гр. печени црвени пиперки

5-6 лажички мајонез

150-200 гр. кашкавал

сол, бибер, суви зачини по желба

масло

топла вода

сув квасец

подготовка: Печените пиперки се лупат, чистат од семки и се сецкаат на ситни парчиња. Им се додаваат мајонезот, зачините, солта и биберот и смесата убаво се меша. Во чинија се раствора сувиот квасец во малку топла вода и се додава маслото. Ова е потребно за попрскување на корите. Редењето на корите оди на следниот начин: првата кора се попрскува со растворениот квасец, врз втората кора се ренда малку кашкавал, а врз третата се става од филот со пиперки. Кога три кори се комплетни се виткаат во ролат и се ставаат во плех за печење. Истото се повторува се додека не се потрошат корите.

Кога ќе се наредат сите во плехот, пред печење се попрскуваат одозгора со преостанатиот растворен квасец.

Се пече околу 20 минути на 180 степени.