Турција се согласи Финска да влезе во НАТО, не и Шведска

Претседателот на Турција, Реџеп Таип Ердоган изјави дека ратификацијата на членството на Финска во НАТО ќе биде завршена до претседателските избори во Турција, но тоа не може да го потврди за Шведска.

• Бевме принудени да го разгледаме членството на Финска одвоено од Шведска бидејќи таму нема манифестација на тероризам како во Шведска. Се надевам дека целиот процес на ратификација ќе биде завршен пред изборите – рече тој.

Како што појасни, Турција не може да каже „да“ за членството на Шведска во НАТО доколку официјален Стокхолм не застане на страната на Анкара во борбата против тероризмот.

• Тероризмот за нас е црвена линија. Ние немаме посебни односи со Шведска, но Стокхолм ги прифати терористите. Курдистанската работничка партија организира демонстрации на улиците на Стокхолм. На Швеѓаните им врачивме список од 120 терористи и побаравме нивна екстрадиција. Премиерот на Шведска е добар човек, но не ни ги предаде терористите – рече Ердоган.