Турската општина Кутахја ќе гради летно кино во Гостивар-Соработка и на други полиња

Општина Гостивар се збратими со Општина Кутахја од Турција. Соработката беше официјализирана со потпишување на Меморандум од страна на градоначалниците, Арбен Таравари и Алим Ишик, денес во Гостивар. Најавени се заеднички настани, посети, меѓусебна поддршка и проекти од различни области.

„Ова е добар почеток на соработка со оваа општина со развиена индустрија во областа на производството на стакло и порцелан, при што ќе направиме напори и ќе ги испитаме можностите стопанственици од таму да донесат капитал и инвестираат и во Гостивар. Со гостите посетивме некои делови од градот, како и местото каде што врз основа на потпишаниот Меморандум, општина Кутахја, во Гостивар ќе изгради летно кино, фантастичен и неопходен проект за развој на културата и забава на граѓаните. Соработката предвидува и одржување на заеднички средби, семинари, средби, културно-спортски манифестации и меѓусебни посети најмалку еднаш годишно.“, истакна гостиварскиот градоначалник.

При потпишувањето на Меморандумот, во чест на воспоставеното збратимување, Таравари и Ишик разменија симболични подароци.