Убиство ноќеска во Тетово – сторителот сам се пријавил во полиција

Едно лице било убиено со пиштол во угостителски објект, синоќа во Тетово. Сторителот најпрво се дал во бегство, а потоа сам се пријавил во полиција.

Јавното обвинителство соопшти дека заедно со увидни екипи од Министерството за внатрешни работи до раните утрински часови вршеле увид на лице место во објектот, лоциран на ул. 29 Ноември во Тетово, каде се случило убиството.

Надлежниот Обвинител издаде наредби за прибирање на траги од лице место и нивно вештачење, како и за вештачење на чаурата најдена на местото на настанот. Издадена е и наредба за вршење на обдукција над починатото лице.

„Убиството се случило откако на маса во објектот заедно седеле пет лица, косумирајќи алкохол. Во еден момент, сторителот извадил пиштол, го репетирал и испукал проектил во едно од лицата. При тоа му нанел смртоносни повреди од кои оштетеното лице починало на лице место. По стореното кривично дело групата се дала во бегство, за подоцна двајца да бидат лишени од слобода од страна на полицијата, а другите двајца, меѓу кои и сторителот, сами се пријавиле во полициска станица.“, соопшти обвинителството.