Ученици од гостиварското средно техничко во Романија се обучуваа за изработка на видео игри

Група од дваесет средношколци од техничкото училиште од Гостивар, заедно со професорките ментори Илина Миноска и Зумбулије Алији беа на двонеделна обука за компјутери и програмирање во Романија.

Учениците таму добија можност теоретски и практично да се запознаат со тајните на изработка на видео игри, како и да разменат знаење и искуства со свои врсници од Бугарија и Романија.

„Престојот во Костанца, Романија ќе остане незаборавно доживување за учениците и за нас менторите. Децата совладаа нови вештини, го надополнија знаењето, имаа шанса да научат како се креираат видео игри, како и да се дружат со останатите учесниц. Во текот на престојот се одржа и мултикултурна вечер, на која нашите ученици ги презентираа културата, традицијата и кујната на Македонија за што освоија златен медал“, вели професорката Миноска.

На крајот од престојот на гостиварските средношколци им беа доделени сертификати за успешно завршен проект.

Обуката за компјутери и програмирање  се спроведе во рамки на Програмата Еразмус+, финансиски поддржана од Европската Унија.