Училиштата „Гоце Делчев“ и „Единство“ ќе добијат пари за обнова на парното греење

Со одлука на Советот на општина Гостивар, на двете основни училишта во градот, „Единство“ и „Гоце Делчев“, ќе им бидат доделени пари од општинскиот буџет за да ги санираат и обноват системите за централно греење. Согласно одлуката, ОУ „Единство“ ќе добие еден милион и 100 илјади денари, додека ОУ „Гоце Делчев“ 1,5 милиони денари за оваа намена, со што би требало да се надминат проблемите со затоплувањето во школите.

Советот на општина Гостивар, на денешната седница донесе одлуки за доделување финансиски средства и за уште неколку други училишта. Така, гимназијата ќе добие 1,4 милиони денари, за опремување на новата спортска сала со потребните реквизити. За средното техничко ќе се издвојат средства за замена на старите прозорци и врати во висина од 630 илјади денари како и за нови цевки на парното греење, во вредност од 885 илјади денари.