Училиштата во Гостивар подготвени за грејната сезона, велат надлежните

Новата грејна сезона официјално започнува денес (15-ти октомври), а училиштата на територијата на општина Гостивар, според оценката на надлежните, се подготвени да обезбедат топли простории за учениците. Сепак, временските услови за сега се поволни, а греењето ќе се активира кога ќе има потреба.

„Според информациите кои ги добив од Секторот за образование, сите училишта се подготвени за новата грејна сезона и не се очекуваат некои проблеми во тој дел. За сега времето е добро, се надевам дека така и ќе продолжи, а кога ќе има потреба ќе се пушти греење“, рече градоначалникот Ваљбон Лимани.

Како и секоја година, училиштата на почетокот ќе се користат резервите на огрев што ги сочувале од минатата грејна сезона, а понатаму ќе следуваат процедурите за набавка на нови количини.

Министерката за образование и наука Весна Јаневска денеска изјави дека очекува сите училишта во земјава да имаат греење. Јаневска рече дека на општините им се исплатени блок дотациите, па на градоначалниците, но и на школите и директорите е да се организираат, за да нема проблеми во однос на грејната сезона.