Училиштата во Гостивар снабдени со греење, второто полугодие почна без проблеми-оценуваат надлежните

Второто полугодие од учебната 2022/2023-та година, училиштата на гостиварска територија го дочекаа подготвени, снабдени со греење и без многу отсуства на ученици. Ова е оценката од надлежите во Секторот за образование на Општина Гостивар, кои денес одржаа состанок со директорите на основните и средни училишта.

„Имаме редовна средба со директорите за почетокот на второто полугодие, да се информираме како течат работите, дали е се‘ во ред. Во училиштата има греење, снабдени се со огрев доволно до март. Може да оцениме дека се‘ се одвива како што треба, немаме некои пријавени проблеми. Не се забележани ниту позначителни бројки за отсуства на ученици, нормално ги има, но не многу, значи како и секоја година во сезона на вируси“, изјави раководителката на секторот Аслијан Снопче.

Денешната средба беше искористена и за презентација на мултиетнички проект на ОБСЕ, кој е во подготовка и ќе почне да се спроведува од септември. Во негови рамки училиштата имаат можност да добијат грантови до 7.000 евра, а активностите може да ги спроведуваат самостојно или во партнерство со други училишта.