Угостителите да не прават залихи овие два дена, препорача министерот Бектеши

Со новата одлука на Владата, почнувајќи од 7 април 2021 (среда), сите угостителски објекти (кафеани, ресторани, барови, клубови) ќе имаат целосна забрана за гости/посетители.

Објектите кои вршат подготовка и продажба на храна може да продаваат преку онлајн или телефонска нарачка и да вршат достава на храна или самостојно подигнување на нарачката надвор од угостителскиот објект, преку пулт.

Министерот за економија Кресник Бектеши излезе со препорака угостителските објекти да не прават залихи, за да не се соочат со поголеми загуби.

„Министерството за економија секогаш е за поддршка на секторот, но очекува разбирање и соработка, се со цел надминување на оваа ситуација. Препорачуваме до сите угостителски објекти да не прават дополнителни залихи денеска и во текот на утрешниот ден, со цел да се избегнат поголеми загуби од воведените рестрикции за работа. Министерството за економија во континуитет работи за поддршка на туристичко-угостителскиот сектор, со цел за полесно справување со негативните ефекти од пандемијата. Поддршката ќе продолжи и во наредниот период. Министерството за економија ќе продолжи да креира мерки за поддршка на секторот. Најважно од се во овој момент е здравјето на граѓаните.“, наведе министерот.

Целосна забранa да примаат гости ќе имаат и хотелите, мотели, хостели, пансиони и други објекти за сместување или на бензински станици кои имаат делови за служење храна.

Исклучок се рестораните во склоп на хотелите, мотелите, хостели и пансиони за оние лица кои се сместени како гости, како и угостителскиоте објекти на Меѓународниот Аеродром Скопје и Аеродромот „Св. Апостол Павле“ во Охрид.