УЈП бара 80 волонтери – одделението во Гостивар ќе прими три

Управата за јавни приходи преку јавен повик бара да ангажира волонтери – студенти, за волонтерска работа во регионалните дирекции и даночните одделенија низ земјава, во периодот од 1 јули до 30 септември. Може да се пријават студенти од областа на општествените науки, природно – математичките науки, техничко – технолошките науки и хуманистичките науки кои имаат познавање на англиски јазик и работа со компјутери MS Windows, MS Office, односно корисничко познавање од мобилни оперативни системи (Android, IOS) и мобилни кориснички апликации.

УЈП предвидува да ангажира вкупно 80 волонтери, додека за даночното одделение во Гостивар планирани се три места.

„Волонтерот има право на надоместок на трошоците за храна и трошоците за превоз до и од местото на волонтирањето најмногу во висина до 15% од просечната месечна плата исплатена за претходната година.“, наведуваат од Управата.
Заинтересираните кандидати треба приложат: потврда за статусот на студент и писмо за интерес со кратка биографија и податоци за контакт.
Документите се доставуваат во писарницата (архивата) на УЈП или преку пошта на адреса: Управа за јавни приходи, Генерална дирекција Скопје, бул. Кузман Јосифовски Питу бр.1, 1000 Скопје
Со назнака: „За Јавен повик за волонтирање во УЈП“.

Пријавувањето трае заклучно со 18 јуни, вторник.