УЈП електронски ќе добива податоци од банките за сметките на граѓаните

Законските измени ќе овозможат Управата за јавни приходи електронски да добива податоци од сметките на граѓаните, кои ќе ги користи за пополнување на годишната даночна пријава.

Директорката на УЈП, Сања Лукаревска денес на прес конференција рече дека досега од банките добивале податоци во хартиена форма, а електронската размена ќе значи подобри услуги за граѓаните и подобро администрирање на персоналниот данок на доход.

– Согласно веќе важечката регулатива, секоја институција која располага со вакви податоци има законска обврска и е должна да ги остави по барање на УЈП. Користењето на податоците не е новина. Она на што се работи една година наназад е оваа размена на податоци да се автоматизира, наместо податоците да се доставуваат во хартиена форма, што е долга, спора постапка за сите страни. Автоматизираната електронска размена на податоци со банките ќе овозможи подобри услуги за граѓаните и истовремено подобро администрирање на персоналниот данок на доход. Побрзо ќе се издаваат уверенија, решенија и други документи во надлежност на управата, рече Лукаревска.

Според неа личните податоци на граѓаните се сигурни и заштитени.

– Издавањето пополнети годишни даночни пријави е дел од реформата за поедноставување на постапките за плаќање на персоналниот данок на доход, која УЈП ја спроведе со користење на средства од ЕУ ИПА фондовите, рече директорката.

Реформата значи дека граѓаните догодина нема да пополнуваат и пријавуваат персонален данок сами, туку УЈП ќе им достави пополнета годишна даночна пријава која тие треба да ја верификуваат.