УЈП: Фирмите да исплатат плати, субвенциите ќе ги добијат по донесување на законот

УЈП ги повика работодавачитекои се во можност да им ги исплатата октомвриските плати на работниците, а државната помош ќе ја добијат по донесување на законот.

„Имајќи го предвид фактот дека законот се уште не е донесен како и краткиот рок за поднесување на барањето за финансиска поддршка за исплата на платите на работниците, работодавачите кои имаат можност за исплата на платата, може истото да го сторат веднаш,а по донесувањето на законот ќе имаат можност да го поднесат барањето и да направат корекција на МПИН образецот за користење на финансиска поддршка за исплата на платите.“, соопштија од Управата за јавни приходи.

Владата во рамките на четвртиот сет економски мерки за ревитализирање на економијата во услови на КОВИД-19 го усвои пакетот мерки кој, меѓу другото, предвидува директна финансиска поддршка на приватниот сектор и стимулирање на компаниите за враќање и задржување на работниците на работните места. Предлог законот е во собраниска процедура.

Барањето за финансиска поддршка на работодавачите за исплата на плати ќе се поднесува до УЈП преку системот е даноци, а од УЈП наведуваат дека барањата ќе се разгледуваат во рок од три дена.

По усвојување на законот Управата за јавни приходи најави дека на прес конференција подетално ќе ги образложи поединостите од Законот односно условите за користење на финансиската поддршка, начинот и роковите за исплата на финансиските средства на работодавачите, постапката на враќање на средствата, но и за казните за прекршување на законските одредби.