Украдени пари од манастирот „Свето Преображение“ во Гостивар

Уште една кражба во верски објект на гостиварското подрачје регистрира полицијата. Вчера (18 октомври) во 18 часот и 20 минути, гостиварецот Ј.М. во СВР Tетово пријавил дека непознати сторители, во периодот од 8 до 18 часот, влегле во манастирот „Свето Преображение Христово“ во населбата Циглана и одзеле пари, информираат од полицијата.

Увид извршила екипа од Одделението за внатрешни работи Гостивар.

Од иницијативниот одбор за изградба на манастирот нагласуваат дека не е прв пат ова православно светилиште да биде мета на крадци.

„Кражби се случувале и друг пат. Неколку пати имаме реагирано и прописно пријавувано. Сметаме дека надлежните треба повеќе да се ангажираат и да преземат мерки, да се најдат крадците и да се спречат ваквите појави“, велат од одборот.

Во вчерашната кражба биле украдени над 20.000 денари доброволен прилог од верници за изградба на манастирот.