Улиците во Гостивар полни со питачи – За наведување деца на питачење следува затвор

Летниот период низ гостиварските улици можат да се забележат голем број питачи, меѓу кои многу деца. Питачењето, а особено злоупотребата на малолетниците во тој поглед, е проблем со кој справувањето оди тешко. Жени со бебиња и мали деца остануваат на улица од раните утрински до доцните вечерни часови и бараат пари од минувачите. Најчесто се движат во централното подрачје, пред верските објекти, околу пазарите, а децата влегуваат и во угостителските објекти за да бараат некој денар од гостите или вработените.

Од Секторот за внатрешни работи Тетово соопштија дека во повеќе наврати преземале превентивни мерки и активности за справување со оваа општествено-девијантна појава и уште еднаш потсетија дека питачењето е спротивно на Законот за прекршоци против јавниот ред и мир и дека за ваков вид прекршок е предвидена глоба од 15 до 50 евра.

„Родителите или други лица кои непосредно ќе ги инволвираат своите или други, најчесто малолетни деца во питачење или на било каков поинаков начин ќе ги запуштат  и злоупотребат, ќе се соочат со кривична одговорност и со затворска казна од најмалку пет години.“, соопшти полицијата