Уништени клупи, корпи за отпад, детски катчиња во Гостивар…Како против ниската свест и неодговорност?

Гостивар страда од ниска свест за зачувување на јавните добра и недостиг на одговорност кога станува збор за јавните површини. Многу често, парковите и другите простори кои се уредени како место за релаксација, прошетки и одмор, стануваат мета на деструктивни поединци, па може да наидете на искршени клупи, уништени корпи за отпад, соборени канделабри и слично.

Од вандализам не се поштедени ниту детските катчиња. Наместо да бидат весели места за игра и дружење на дечињата, стануваат простор со непријатна глетка: руинирани лулашки, лизгалки и разни други реквизити упропастени од човечка рака.

Демолирана урбана опрема ќе ве пречека и во детското игралиште во градскиот парк, како и во делови од шеталишето на Кејот на Вардар. Иако неколкупати се обновувани, повторно стануваат жртви на вандалско однесување.

Локалната самоуправа најавува дека напролет ќе работи на обновување на урбаната опрема и заедно со полицијата и инспекторите ќе се преземаат мерки за да се спречува уништувањето.  „Пред сѐ општината напролет планира да ги реновира и да ги обнови сите детските катчиња, игралишта и урбаната опрема насекаде низ градот. Се надеваме дека во соработка со МВР, но и со инспекциските служби при Општина Гостивар ќе ја подобриме состојбата, а ќе се потрудиме и да ја покренеме свеста кај граѓаните. Сепак сите овие детски катчиња и урбаната опрема се на граѓаните, не се на општината или на државата и сите заеднички треба да внимаваме на нив и да ги чуваме, а не да ги уништуваме.“, рече градоначалникот Ваљбон Лимани.

Може да се забележи дека во бранот упропастувања настрада и едно уметничко дело-монументалната скулптура од авторот Џезаир Реџепи, која беше поставена пред две години на Кејот на Вардар.

„Kога гледам како мојата работа е уништена, чувствувам жалење и недостаток на ценење на јавната уметност. Oва не е добро чувство за мене како уметник затоа што сум вложил креативност и труд, таму има дел од мојата душа. А кога ќе видите како некое ваше дело вака се третира, освен лутина, чувствувате и потреба да го вратите во претходната форма, како симбол за јавноста и заедницата на Гостивар“, рече Реџепи.