Уписите во градинките во Гостивар се етапни, на листа на чекање има околу 190 деца

Гостиварските градинки ја почнаа новата учебна година со нови сили, планови и подготовки. Установата функционира и преку летниот период, но со намален капацитет поради годишните одмори, па во септември вообичаено се работи со засилен интензитет. Се поднесуваат документи, се формираат групите, течат административните обврски околу уписите и приемот кои се етапни, поради потребата од извесен период на адаптација на дечињата.

Градинките на подрачјето на Гостивар заедно со Центрите за ран детски развој имаат проектиран капацитет од 874 дечиња. Моментално запишани се скоро 590, додека претходно 270 деца од големите групи беа испратени во прво одделение.

„Новозапишани дечиња заклучно со 10 септември се 130. Уписот на деца се одвива етапно и континуирано, во зависност од адаптацијата на децата во групата. Некои се адаптираат брзо, додека не други им треба повеќе време, па на тоа мора да се обрне поголемо внимание и да не се создаваат гужви. Се планира да се запишат уште 130 дечиња во тековниот период, до крајот на оваа учебна година. Моменталната листа на чекање е 193, но таа се зголемува и намалува во однос на запишување и отпишување. Генерално се намали листата на чекање, со тоа што се отвори новиот објект со капацитет од 100 деца.“, информира директорката на градинките Даниела Бошкоска.

Установата моментално има вкупно 87 вработени и 24 ангажирани лица со договор на дело. Градинките имаат потреба од десет нови вработувања на различни профили, за што е поднесено барање до Министерството за социјална политика.

„Станува збор за персонал од различен профил, меѓу кои и логопед, административни службеници, технички персонал…Се надеваме дека до крајот на оваа фискална година ќе добиеме согласности“, вели Бошкоска.

Во однос на подобрување на условите за згрижување на дечињата, како поголем зафат планирано е реновирање на 11 тоалети во објектот „Цветови“, во кој ќе се работи и на обнова на фасадата.