УСАИД: Сите вработени на административен одмор од сабота, освен персоналот на клучните функции

Американската агенција за меѓународен развој (УСАИД) соопшти дека од петок, 7 февруари, во 23:59 часот, сите нејзини вработени ширум светот ќе бидат ставени на административно отсуство, со исклучок на одреден персонал одговорен за клучните функции и програми.

Како што е наведено, основниот персонал кој се очекува да продолжи со работа ќе бидат известени од раководството на агенцијата најдоцна до четврток, 6 февруари, во 15:00 часот по локално време.

За персоналот на УСАИД кој е распореден надвор од САД, агенцијата подготвува план во координација со мисиите и Стејт департментот за нивно враќање во рок од 30 дена, како и за прекинување на договорите што не се сметаат за суштински. Исклучоци од оваа одлука ќе се разгледуваат врз основа на лични или семејни тешкотии, медицински потреби, безбедносни причини и други фактори.

Одлуката доаѓа откако американскиот претседател Доналд Трамп на почетокот на февруари потврди дека ќе ја укине УСАИД, во рамки на плановите за реорганизација и можен спој со Стејт департментот. Овој потег е дел од пошироката политика „Америка на прво место“, со која администрацијата на Трамп настојува да ги намали трошоците за меѓународна помош и да го оптимизира државниот апарат.

УСАИД, основана во 1961 година, е една од најголемите агенции за меѓународна помош во светот, со мисии во повеќе од 100 земји, особено во Африка, Азија, Јужна Америка, Блискиот Исток и Источна Европа.