Успешен концерт во Гостивар на друштвото „Браќа Ѓиноски“ во чест на Велигден

Во големата сала на Центарот за култура „АСНОМ“ вечерва, градското аматерско културно уметничко друштво „Браќа Ѓиноски“ Гостивар одржа концерт во чест на големиот христијански празник Велигден. Играорците, оркестарот и пејачите ја исполнија програмата со фолклорни игри, ора и македонски народни песни и повторно докажаа дека се вложуваат целосно кога се на сцена, во мисија на зачувување и негување на вредните традиции и фолклорот.

На почетокот низ најавата, присутните имаа можност да се потсетат на историјатот на ГАКУД „Браќа Ѓиноски“, реализираните настапи и концерти, учества на фестивали во државата и надвор и сл. При тоа беше речено дека друштвото од своето формирање до денес има одржано 694 концерти на народни ора и песни, а во последните две години 34 и тоа пред домашната публика, во Маврово, Тетово, Куманово, Македонски Брод и други места.

На вечерашниот концерт фолклорната секција се претстави со сплетовите „Тресеница”, „Водарки”, „Повардарие”, а свои солистички настапи имаа Бојан Илиески, Мирослав Крстески и Јовица Николоски.

Настанот го организираше Националната установа Центар за култура “АСНОМ” со поддршка на Министерството за култура и О.Гостивар.